All Posts By

Egi Promo

Për herë të parë, çelet ekspozita me dekorata dhe medalje

By | Uncategorized | No Comments

Drejtoria e Përgjithshme e Arkivave së bashku me Muzeun Historik Kombëtar, sollën sot për publikun ekspozitën “Dekorata dhe medalje”.

Në këtë ekspozitë janë paraqitur dekorata dhe medalje me të cilat janë nderuar personalitete shqiptare e të huaja për meritat e tyre të pashembullta në përfaqësimin dhe ngritjen e kombit dhe Shqipërisë.

Në çeljen e kësaj ekspozite, Drejtori i Muzeut Historik Kombëtar Dorian Koçi u shpreh i lumtur për këtë ekspozitë dhe vlerësoi bashkëpunimin e ngushtë dhe model që ka Muzeu Historik Kombëtar me Drejtorinë e Përgjithshme të Arkivave.

“Kam kënaqësinë të konstatoj se ky bashkëpunim është model dhe sigurisht më duhet të përgëzoj stafet e të dy institucioneve që e kanë gjetur vetveten në një bashkëpunim shumë të ngushtë dhe që shkon drejt një bashkëpunimi shumë të natyrshëm për sa i përket memories sonë kolektive dhe pasqyrimit sa më të saktë të historisë nëpërmjet dokumentacionit” shprehu Koçi.

Një pjesë e dekoratave dhe medaljeve që ruhen nga Drejtoria e Përgjithshme e Arkivave dhe Muzeu Historik Kombëtar publikohen për herë të parë për publikun.

Gjatë fjalës hyrëse Drejtori i Muzeut Kombëtar Dorian Koçi tregoi se Muzeu ruan një koleksion shumë të bukur të ardhur nga Anglia, të dhuruar nga pasardhësit e familjes së sekretarit të Princ Vidit. Ai po ashtu tregoi se ruhen edhe disa dekorata dhe medalje të heronjëve të luftës si dhe dekorata “Nderi i Kombit” dhënë Andon Zako Çajupit që shoqata “Zagoria” ia ka dhuruar Muzeut Historik Kombëtar.

Drejtori i Përgjithshëm i Arkivave Dr.Ardit Bidon në fjalën e tij shprehu kënaqësinë e veçantë që po bëhet e mundur që pasuria që shpesh herë qëndron e fshehur tashmë po bëhet e aksesueshme dhe se kjo ekspozitë është një shans për të gjithë qytetarët për t’u njohur me një pjesë të pasurisë sonë kombëtare.

“Mund ta shikojmë në shumë këndvështrime këtë gjë, mund ta shohim nga pikëpamja stilistike sepse disa prej këtyre dekoratave të vjetra janë jashtëzakonisht të bukura, të cilat nga pikëpamja stilistike kanë një vlerë të veçantë. Mund ta shikojmë nga pikëpamja e vlerave, ku dekoratat i janë dhënë personaliteteve më të mëdha të kombit tonë dhe rrjedhimisht ato fshehin dhe një histori tjetër nga pas. Mund ta shikojmë po ashtu nga pikëpamja e nivelit, pra të gradës së këtyre dekoratave sikurse dhe të kohëzgjatjes që nisi, që nga fillesat e shtetit Shqiptar, që nga Principata e Vidit dhe vijnë deri në ditët e sotme” tha Dr. Bido.

Ekspozita “Dekorata dhe medalje” do të jetë e hapur për dy javë në Ambientet e Muzeut Historik Kombëtar.

DPA çel ekspozitën me botime të revistës “Hylli i Dritës”

By | Uncategorized | No Comments

Me rastin e 106 vjetorit të botimit të parë të revistës “Hylli i Dritës”, Drejtoria e Përgjithshme e Arkivave ekspozoi sot në mjediset e Kalasë së Tiranës një pjesë të numrave të revistës së themeluar nga At Gjergj Fishta në tetor të vitit 1913.

Ekspozita vjen në bashkëpunim me Bibliotekën Kombëtare dhe Kalanë e Tiranës. Të pranishëm në prezantimin e saj ishin Drejtori i Përgjithshëm i Arkivave Dr. Ardit Bido, zëvendësdrejtorja e Bibliotekës Kombëtare znj. Etleva Domi, Frati Françeskan At Vitor Demaj dhe administratorja e Kalasë së Tiranës Klodiana Toptani.

Pjesëmarrësit panë me interes koleksionin që ruhet në Bibliotekën e DPA-së dhe në Bibliotekën Kombëtare. Për të gjithë të interesuarit që duan të shohin nga afër revistën e cila ka luajtur një rol të rëndësishëm në formimin kulturor të Shqipërisë, ju bëjmë me dije se ekspozita do të jetë e hapur edhe nesër.

DPA nis digjitalizimin e fondit arkivor të “Komunitetit Katolik në Shqipëri”

By | Uncategorized | No Comments

Drejtoria e Përgjithshme e Arkivave nënshkroi sot marrëveshje bashkëpunimi me Komunitetin Katolik në Shqipëri. Marrëveshja ka për qëllim bashkëpunimin e dy institucioneve për të digjitalizuar dokumentet arkivore të Komunitetit Katolik në Shqipëri.

Marrëveshja u nënshkrua nga Drejtori i Përgjithshëm i Arkivave Dr. Ardit Bido dhe Ipeshkvi Gjergj Meta.

Drejtori i Përgjithshëm i Arkivave Dr. Ardit Bido tregoi se kjo marrëveshje konsiston në digjitalizimin e të gjithë dokumentacionit të Komunitetit Katolik në Shqipëri dhe të çdo materiali tjetër që është krijuar për Komunitetin Katolik që ndodhet në Fondet Arkivore.

“Në rradhë të parë është korigjimi i një padrejtësie historike përmes një vije të përbashkët ku i gjithë dokumentacioni i cili është sekuestruar komuniteteve fetare iu rikthehet atyre tashmë në formë digjitale ndërkohë që kopja origjinale ruhet në Arkivin Qendror Shtetëror, ku ekzistojnë kushtet e nevojshme të ruajtes së saj” tha Dr. Bido.

Gjithashtu Dr. Bido theksoi se Drejtoria e Përgjithshme e Arkivave do të sigurojë teknologjinë dhe pajisjet e nevojshme për zhvillimin e procesit të digjitalizimit dhe të depozitimit të dokumenteve, ndërsa Komuniteti Katolik do të vërë në dispozicion të Drejtorisë së Përgjithshme të Arkivave, persona nga stafi i tij me qëllim skanimin e dokumenteve.

Ipeshkvi Gjergj Meta vlerësoi shumë këtë moment si një hap i mjaft të rëndësishëm. Ai përshëndeti iniciativën e ndërmarrë dhe për këmbënguljen për të gjetur një zgjidhje.

“Kjo është një padrejtësi që i është bërë arkivave të Kishave Katolike, duke u konfiskuar, tani po riparohet në një farë mënyre, nëpërmjet kësaj rruge të ndërmjetme, që është digjitalizimi. Duhet thënë një fakt, sikurse thotë një shprehje, ‘Jo çdo e keqe vjen për të keq’, në fakt falë Arkivit Qendror Shetëror shumë dokumente janë ruajtur” u shpeh Ipeshkvi Gjergj Meta.

Në saje të kësaj marrëveshjeje, Dokumentet do të skanohen sipas parimeve tekniko-profesionale arkivore, në nivel Fondi, Viti, Dosje dhe Fletë.

Nisi sot seminari për punën në sekretari – arkiv

By | Uncategorized | No Comments

Drejtoria e Përgjithshme e Arkivave sot nisi seminarin e radhës për punën me dokumente në sekretari dhe arkiv.

Pjesëmarrësit në këtë seminar do të zgjerojnë njohuritë e tyre në teori dhe në praktikë për organizimin dhe funksionimin e arkivave. Do të njihen me Ligjin “Për Arkivat” dhe “Normat tekniko-profesionale dhe metodologjike të shërbimit arkivor në Republiken e Shqipërisë”, me evidentimin e dokumenteve, klasifikimin, digjitalizimin e tyre, vlerën e ruajtjes së dokumenteve si dhe me përpilimin e shkresave zyrtare. Gjithashtu do të informohen mbi faktorët dëmtues të dokumenteve, mbrojtjen dhe kushtet e ruajtjes së tyre.

Gjatë këtyre ditëve do të ketë seminare në teori dhe në varësi të temave do të zhvillohet aplikimi i tyre dhe në praktikë prej specialistëve të DPA-së. Trajnimi do të zgjasë dy javë, deri më 1 nëntor. Pjesëmarrës janë të gjithë ata që kanë aplikuar paraprakisht për t’u trajnuar.

 

Biblioteka e Arkivit Qendror Shtetëror pasurohet nga Akademia e Shkencave

By | Uncategorized | No Comments

Akademia e Shkencave pasuroi sot Bibliotekën e Arkivit Qendror Shtetëror duke i dhuruar dhjetra libra. Në këtë dhurim të pranishëm ishin Drejtori i Përgjithshëm i Arkivave Dr. Ardit Bido, Nënkryetari i Akademisë së Shkencave, akademiku Vasil Tole, studiuesi Irakli Koçollari dhe stafi i Bibliotekave të dy institucioneve.

Akademiku Vasil Tole shprehu kënaqësinë që ndodhej në mjediset e Dpa-së, për këtë xhest simbolik të dhurimit të librave shkencor, që akademikët përgjithësisht, studiuesit shqiptarë botojnë përmes entin botues të Akademisë së Shkencave. “Është kënaqësi dhe një shenjë e qartë e bashkëpunimit afatgjatë që Akademia e shkencave si institucion, ish institutet në varësi të saj por dhe akademikët sot kanë në Arkivin Qendror të Shtetit në të gjitha nivelet, jo vetëm në Tiranë, po kudo ku ka Arkiva në Shqipëri, pasi gjykojmë që edhe këto vepra do të ishin të pamundura që të krijoheshin, për më tepër pastaj të botoheshin pa kontributin dhe veprimtarinë e Arkivave të Shqipërisë dhe posaçarisht të dokumentacionit që administrohet në këto Arkiva” -tha akademiku Vasil Tole.

Z.Tole falenderoi z.Bido dhe të gjithë punonjësit e Arkivave që po u krijojnë kushte studiuesve për t’i shfrytëzuar këto dokumente dhe theksoi se ky nuk është dhurimi i fundit por është thjesht një hap që Akademia e Shkencave dhe sektori përkatës i botimeve në Akademi bën për këto dhurime.

Drejtori i Përgjithshëm i Arkivave, z.Ardit Bido, i shprehu mirënjohjen z. Tole për dhurimin e librave për bibliotekën, duke e pasuruar më tej atë.

“Dua të falenderoj profesor Vasil Tolen dhe profesor Irakli Koçollarin për këtë ndihmesë të vazhdueshme që Akademia e Shkencave bën për Arkivin Qendror Shtetëror. Dhurimi i këtyre librave vjen në fakt në kuadër të diçkaje shumë të rëndësishme që është krijimi i një Biblioteke Qendrore në mjediset e Drejtorisë së Përgjithshme të Arkivave, ku të gjithë studiuesit jo vetëm të kenë mundësi që të ndjekin dhe të shohin dhe të studiojnë materialin arkivor por dhe materialin bibliotekar”-u shpreh z.Bido. Ndërsa shtoi se Biblioteka ka qenë një magazinë librash deri më tani në Drejtorinë e Përgjithshme të Arkivave. “Proçesi i punës është në fazën finale ku thuajse klasifikimi ka përfunduar po përgatisim software dhe besoj për shumë shpejt mbase në dhjetor – janar do të jetë e aksesueshme për studiuesit, që në çastin që vijnë në sallën e studimit mund të porosisin dosje arkivore por njëkohësisht të mund të porosisin edhe libra” -tha z.Bido.

Studuesi Irakli Koçollari tha në fjalën e tij se Arkivi ka në thelbin e tij materialet unike në vlerat e tyre, dokumente që fillojnë që nga dorëshkrime deri në dokumentet më të rralla, që gjenden vetëm në Arkiv dhe askund tjetër.

“Ky dokumentacion që gjendet në Arkiv, një pjesë e tij natyrisht është përpunuar, kur themi është përpunuar, është marrë nga studiues, nga shkencëtar të fushës përkatëse dhe e ka sjell atë jo më një si një dokument të vetëm dhe unik por dhe të lidhur me shumë sfonde të tjera të caktuara, siç është sfondi historik, persona dhe personalitete, në tërësi e shkëput nga mëvehtësia dokumentin dhe e bën atë të lidhur me sfondin historik të shumë ngjarjeve dhe të shumë fenomeneve. Fondi sigurisht këtu është i pafund, që është këtu dhe askund tjetër, por një pjesë e tij siç edhe e thash është përpunuar në tematika dhe subjekte të caktuara, dhe në këtë mënyrë studiuesit e gjejnë jo vetëm si një dokument të vetëm por edhe të përpunuar, të unifikuar, në një produkt të gatshëm. Ndaj është e nevojshme dhe prania e studimeve dhe burimeve dytësore krahas burimeve parësore historike, për të krijuar një lehtësi dhe qartësi në interpretimin e dokumenteve historikë”-tha studiuesi z.Koçollari.

Biblioteka e Arkivit Qendror Shtetëror administron dhe ruan mbi 10.000 libra. Natyra e librave në bibliotekë është e larmishme, midis tyre gjenden Enciklopedi, libra historikë, fetarë, fjalorë, fletore zyrtare, metoda, etj. Librat janë të viteve të ndryshme, ata më të hershmit janë klasifikuar tek fondi i librave të rrallë dhe ruhen në Dhomën e Fortë të AQSh. Gjuha e librave është e ndryshme, ka në italisht, frengjisht, greqisht, latinisht, osmanisht, etj. Kjo bibliotekë ka një traditë pasurimi përmes studiuesve të cilët shfrytëzojnë sallën e AQSh për studimet e tyre. Në nxjerrjen në dritë të botimeve këta studiues dhurojnë një kopje në bibliotekën e AQSh.

Krahas pasurimit të vazhdueshëm të Bibliotekës, në Drejtorinë e Përgjithshme të Arkivave po punohet çdo ditë për inventarizimin digjital dhe për pasqyrimin e këtij skedari në variantin elektronik, me synimin që Biblioteka të jetë më e lehtë e aksesueshme në shfletimin e informacionit bibliografik.

Thirrje për Trajnim Arkivor

By | Uncategorized | No Comments

Drejtoria e Përgjithshme e Arkivave ju bën thirrje të gjithë nëpunësve të institucioneve shtetërore por dhe individëve të tjerë të interesuar për punën me dokumentet, për të marrë pjesë në seminarin që do të zhvillohet për punën në arkiv – protokoll, nga data 21 Tetor 2019 deri më 1 Nëntor 2019.

Ky seminar ka për qëllim ngritjen profesionale dhe shkencore të punonjësve të sekretari-arkivave të institucioneve shtetërore qëndore dhe vendore, për njohjen dhe zbatimin e Ligjit “Për Arkivat’’ si dhe “Norma tekniko-profesionale dhe metodologjike të shërbimit arkivor në Republikën e Shqipërisë”.

Temat kryesore që do të trajtohen  në këtë seminar do të jenë jenë:

1- Njohje me Ligjin “Për arkivat” dhe “Norma tekniko-profesionale dhe metodologjike të shërbimit arkivor në Republiken e Shqipërisë”.

2- Evidentimi i dokumenteve, qarkullimi dhe sigurimi i tërësisë së tyre në sekretari, si dhe mjetet e evidentimit.

3- Klasifikimi,sistemimi i dokumenteve arkivore, kriteret e klasifikimit, skemat e klasifikimit, kriteret e krijimit të njësive të ruajtjes, përshkrimi, renditja, inventarizimi dhe dorëzimi i dokumenteve .

4- Ekspertiza e vlerës së ruajtjes së dokumenteve, përmbajtja, qëllimi, parimet, kriteret, dhe organizimi i punës për kryerjen e saj.

5- Përpilimi i shkresave zyrtare si dhe rregullat për krijimin dhe zbatimin e elementëve të dokumentit.

6- Faktorët dëmtues të dokumenteve, mbrojtja dhe kushtet e ruajtjes e tyre

7 -Teknologjia dixhitale, dixhitalizimi i dokumenteve

8- Praktikë: njohuritë e marra në leksione dhe zbatimi i tyre në proceset e punës arkivore.

Në përfundim të seminarit pjesëmarrësit do të pajisen me certifikatën përkatëse. Për të marrë pjesë mund të aplikoni nëpërmjet emailit në  dpa@arkiva.gov.al deri më 10 tetor 2019.

Të gjithë të kualifikuarit që do të vazhdojnë këtë seminar do të njoftohen individualisht po nëpërmjet emailit.

Ekspozitë e DPA-së: Zemër Shqiptare, Shën Tereza na bashkon!

By | Uncategorized | No Comments

Drejtoria e Përgjithshme e Arkivave, me rastin e 22 vjetorit të ndarjes nga jeta e Nënë Terezës, duke përkuar dhe me 5 shtatorin, Ditën e Shenjtërimit të saj, hapi ekspozitën “Zemër Shqiptare, Shën Tereza na bashkon – 22 vjet pas kalimit në amshim të Shën Terezës”.

Ky projekt vjen në bashkëpunim mes Drejtorisë së Përgjishme të Arkivave, Kalasë së Tiranës dhe Institutit të Trashëgimisë Shpirtërore dhe Kulturore të Shqiptarëve të Maqedonisë së Veriut. Në ekspozitë u shpalosën dokumente dhe fotografi nga aspekte interesante të jetës dhe veprës së Shën Terezës.

Në këtë aktivitet ishin të pranishëm, përgjegjësja e Promovimit dhe Komunikimit në DPA Elsa Saka, nënkryetari i Bashkisë së Tiranës Andi Seferi, administratorja e Kalasë së Tiranës Klodjana Toptani, ambasadori i Kosovës në Shqipëri Sylë Ukshini, nga Kisha ortodokse Arkimandrit Kozma Prifti, etj.

Shën Tereza, humanistja shqiptare, nobelistja, misionarja e jashtëzakonshme, e bekuara e Vatikanit, e cila çdo ditë të jetës së saj ia kushtoi bamirësisë, kujtohet në këtë ekspozitë e cila do të qëndrojë e hapur deri të dielën, më 8 shtator, në ambientet e Kalasë së Tiranës.

350 mijë dokumenta osmane, pasurimi më i madh i AQSH-së ndër vite

By | Uncategorized | No Comments

Drejtoria e Përgjithshme e Arkivave ka kënaqësinë të njoftojë të gjithë shqiptarët mbi pasurimin më të madh të Arkivit Qendror Shtetëror me dokumente mbi historinë tonë kolektive kombëtare, të ndodhur në një dhurim të vetëm.
Më shumë se 350 mijë fletë dokumente që datojnë nga shekulli i 15 deri në çerekun e parë të shekullit të XX mbi Shqipërinë dhe shqiptarët janë marrë nga Arkivi Qendror i Perandorisë Osmane me qendër në Stamboll në formë dixhitale, kjo falë marrëveshjes së bashkëpunimit që Drejtoria e Përgjithshme e Arkivave ka me Arkivin Qendror të Stambollit për shkëmbimin e dokumenteve arkivore nga të dyja palët.
Kjo shumë përbën përafërsisht gjysmën e të gjithë dokumenteve që Arkivi I Stambollit ka mbi Shqipërinë dhe shqiptarët dhe që pjesa tjetër pritet të merret shumë shpejtë.
Pjesa më e madhe e tyre i përkasin shekullit 19 dhe 20, ku tregohet për zhvillimet për Shqipërinë e shqiptarët në Perandorinë Osmane, reformat, kryengritjet shqiptare dhe masat osmane për t’i shtypur ato, çështjet fetare, arsimore, ku madje trajtohet edhe çështja e shkrimit të gjuhës shqipe.
Dokumenti më i vjetër daton më 8 shkurt 1455 dhe është një regjistër që përfshin timare në Rumeli ku përfshihen dhe qytetet shqiptare si Prizreni, Janina dhe Elbasani.
Ndër materialet që arkivi ka marrë është edhe urdhëresa që u është dërguar mytasarifëve të Ohrit, Vlorës, Delvinës, valiut të Bosnjës dhe myteselimit të Podgoricës, për arrestimin e mutasarifit të Shkodrës Mahmut Pashës dhe vëllait të tij Ahmet Pashës, të Bushatllinjve, për shkak se kanë bashkëpunuar me kryengritësit shqiptarë dhe malazezë.
Në mesin e këtyre dokumneteve ndodhet edhe fermani me këshilla administrative që i është sjellë Ali Pashë Tepelenës për të siguar rregullin dhe qetësinë në kalanë e Pargës, Prevezës, Potrinit dhe Dubnicës, që u rimorën prej francezëve.
Po ashtu, një ndër dokumentet është edhe shkresa e përgjegjësit të Moresë, Ahmet Pashës, ku urdhërohet Kurt Pasha dhe pashallarët e tjerë për të mos lejuar kthimin e shqiptarëve të shpërngulur përsëri në More, pra arvanitasit.
Edhe pjesa tjetër e materialeve të tjera po ashtu janë shkresa, urdhëresa dhe fermane që japin një pasqyrë për zhvillimet politike dhe shoqërore të shqiptarëve nën Perandorinë Osmane, ndërsa ka edhe të dhëna biografike të Ismail Qemalit si nëpunës i administratës osmane.
Ky pasurim përbën përpjekjen disavje]are të arkivit shqiptar. Më herët, gjatë vitit 2015 janë marrë përafërsisht 5 mijë fletë dokumente. Tashmë, janë marrë 350 mijë dokumente dhe po aq pritet të mbërrijnë Brenda këtij viti. Në këtë mënyrë, AQSH përmban sot jo vetëm tërësinë e historisë dokumentare të Shqipërisë dhe shqiptarëve pas pavarësisë, por edhe të periudhës osmane, me përjashtim të dokumenteve pronësore.

 

Studentët njihen me trashëgiminë kulturore bizantine dhe pasbizantine në Shqipëri

By | Uncategorized | No Comments

Sot në Drejtorinë e Përgjithshme të Arkivave u zhvillua seminari i Shkollës Verore e Gjuhës, Historisë dhe Civilizimit Bizantin.

Përmes leksioneve dhe referateve studentët u njohën me dokumente në gjuhën greke. Ata panë nga afër kodikët të cilët ruhen në Arkivin Qendror Shtetëror.

Nga pedagogu Andi Rembeci, përgjegjës dhe koordinator i Shkollës Verore ndoqën leksionin “Duke shfletuar Bizantin nga Shqipëria: Kodikë-Tekste-Art”, kurse profesor Agamemnon Tselikas, autoritet botëror në Paleografi, ligjëroi në temën “Vështrim mbi të dhënat arkivore bizantine dhe dokumente të diplomatikës”.

“Jemi në një institucion shumë të rëndësishm, jemi në mjediset e Arkivit, që është zemra e historisë së çdo shteti. Nga këtu ku jemi ju mund të kuptoni rëndësinë dhe vlerën që ka ky mjedis dhe se çfarë do të thotë që ju të studioni materiale që doni” u shpreh profesor Agamemnon Tselikas.

Drejtori i Drejtorisë së Përgjthshme të Arkivave Dr.Ardit Bido në fjalën e tij përshëndetëse tha se dyert e Arkivit janë gjithnjë të hapura për cilindo studiues, pasi Arkivi është pjesa thelbësore e kërkimit shkencor.

“Arkivi Qendror Shtetëror është një arkiv i cili është krijuar vonë, në vitin 1948 dhe si rrjedhojë dhe materialet që ne disponojmë në numër është shumë i vogël, në krahasim me arkivat e tjera analoge të vendeve të tjera perëndimore. Nuk kemi dokumentacion mjaftueshëm përpara vitit 1912 por kemi dokumentacion përpara ’12 të vogël por sifinjikativ, kemi një ndër kodikët më të vjetër që ekziston në botë, kodikun e purpurt të Beratit, i cili është pjesë e trashëgimisë botërore. Edhe pse kemi dokumentacion të pakët mund të themi se kemi dokumentacion të pasur dhe ndonjëherë është cilësia e cila ka më shumë vlerë se sa sasia” tha Dr.Bido.

Kjo shkollë organizohet për të tretin vit radhazi nga Departamenti i Historisë në Fakultetin e Historisë dhe të Filologjisë, nën kujdesin e Ambasadës së Greqisë në Tiranë dhe me mbështetje të Fondacionit Alexander S. Onassis dhe National Bank οf Greece Cultural Foundation.

DPA nënshkruan marrëveshje bashkëpunimi me Shoqatën “Papa Klementi XI Albani”

By | Uncategorized | No Comments

Drejtoria e Përgjithshme e Arkivave nënshkroi sot një marrëveshje bashkëpunimi me Shoqatën e Shkrimtarëve dhe Artistëve Shqiptar “Papa Klementi XI Albani” në Suedi. Marrëveshja si qëllim ka bashkëpunimin midis dy institucioneve në fushën e botimeve dhe aktiviteteve të përbashkëta shkencore dhe kulturore.

Drejtori i Drejtorisë së Inspektimit dhe Trajnimit z.Endrit Musaj tha se ndihej i lumtur që pas takimit dhe njohjes me Shoqatën e Shkrimtarëve dhe Artistëve Shqiptar “Papa Klementi XI Albani” në Konferencën e III Mbarëkombëtare të Arkivistikës në Shkup po ndërmerret ky hap cilësor për bashkëpunim. “Kjo marrëveshje ka të bëj me hulumtime, botime, simpoziume, veprimtari të përbashkëta, qoftë në Shqipëri, Suedi apo Kosovë. Uroj që kjo marrëveshje nuk do të jetë vetëm formale dhe të ngelet në letër por të konkretizohet me punë” u shpreh z.Musaj.

Kryetar i shoqatës “Papa Klementi XI Albani” z.Hysen Ibrahimi falenderoi Drejtorinë e Përgjithshme të Arkivave për mirëpritjen dhe për këtë bashkëpunim shumë të sinqertë. “Marrëveshja e bashkëpunimit mes institucioneve ka të bëj dhe me shkëmbimeve të ndryshme të materialeve të arkivistikës apo punëve studimore, madje ne sot i kemi sjell Drejtorisë së Përgjithshme të Arkivave ne formë digjitale 10 numra të librit “Thesar Kombëtar i Mergates Shqiptare, i cili permban shumë shënime dhe dokumente, kryesisht për veprimtari dhe çështje të Kosovës por edhe Shqiptare” tha Ibrahimi.